سوات، سابقہ ناظم پی ٹی آئی کی مبینہ جعل سازی،سیکنڈ ائیر پیپر میں اپنی جگہ دوسرے بندے کو بٹھا دیا

سوات(مارننگ پوسٹ) مٹہ کے علاقہ گٹ شور میں سابقہ ناظم پی ٹی آئی کی مبینہ جعل سازی ، سیکنڈ ائیر پیپر میں اپنی جگہ دوسرے بندے کو بٹھا دیا، کنٹرولر نے پیپر دینے والے شخص کو پکڑ کر پیپر کینسل کردیا، تحریک انصاف کی جانب سے مبینہ دباؤ کے باعث معاملے کو رفع دفع کردیا گیا۔ ذرائع کا کہنا ہے کہ سوات کی تحصیل مٹہ کے علاقہ گٹ شور کے ہائی سکول میں سابقہ ناظم گٹ چاتوڑیامحمد رحیم جن کا تعلق پی ٹی آئی سے ہیں نے اپنے سیکنڈ ائیر کے پیپر میں اپنی جگہ دوسرے شخص بٹھایا تھا ۔ دوسرے پیپر میں مذکورہ ہال پر کنٹرولر نے چھاپہ مارا اور شک کی بنیاد پر اُس شخص کو پکڑ کر اُس کا پیپر کینسل کردیا۔ ذرائع کا کہنا ہے کہ پی ٹی آئی کے اعلیٰ حکومتی نمائندوں کے مبینہ دباؤ کے باعث کنٹرولر نے معاملے کو رفع دفع کردیا۔ اس حوالے سے کنٹرولر سوات بورڈ نے بیان جاری کیا تھا کہ سوشل میڈیا کی خبروں میں کوئی صداقت نہیں، مذکورہ حال میں امتحان احسن طریقے سے جاری ہے اور عبدالرحیم نامی طالب علم کے خلاف پہلے ہی دن سے سپرنٹنڈنٹ نے کارروائی کی تھی۔ دوسری جانب ذرائع کا یہ بھی کہنا ہے کہ مذکورہ ناظم انگھوٹا چھاپ ہے جس نے مبینہ طور پر پرائمری، مڈل اور میٹرک کے سرٹفیکیٹ بھی بوکس طریقے سے بنوائے ہیں۔ اس حوالے سے بعد ازاں مذکورہ علاقہ کے مشران نے پریس کانفرنس کی اور واقعے کی انکوائری کا مطالبہ کیا۔ مشران کا کہنا تھا کہ واقعے کے بعد امتحانی حال میں طلبہ و طالبات کو ذہنی دباؤ کا سامنا ہے خاص کر فی میل سٹوڈنٹس کی تلاشی لی جاتی ہے ان کے چہرے چیک کئے جاتے ہیں کیونکہ سکولوں کی کمی کی وجہ سے مذکورہ حال میں میل اور فی میل سٹوڈنٹس ایک ساتھ امتحان دے رہے ہیں ۔ علاقہ مشران نے واقعے کی انکوائری اور فی میل سٹوڈنٹس کے لئے الگ امتحانی حال کا مطالبہ بھی کیا ہے۔