پشاور: وزیراعلیٰ خیبر پختونخوا علی امین گنڈا پور نے اعتراف کیا ہے کہ پارٹی انتشار کا شکار ہوگئی ہے،بانی عمران خان چاہتے ہیں کہ پارٹی تقسیم نہ ہوں ۔
پشاور میں اجلاس کے دوران گفتگو کے دوران وزیراعلیٰ خیبر پختونخوا علی امین گنڈا پور نے پی ٹی آئی میں سینٹ الیکشن میں ٹکٹوں کی تقسیم کے حوالے سے ہونے والی تنقید پر برہمی کا اظہار کیا ہے۔
انہوں نے کہا کہ ٹکٹوں کی تقسیم میں میرا کیا کام، سینٹ الیکشن میں ڈرامہ کیا گیا مجھ پر تنقید کی گئی جبکہ ہم خان کے حکم پر عملدرآمد کرتے ہیں کیونکہ یہ پارٹی ان کی ہی ہے۔
علی امین گنڈا پور کا کہنا تھا کہ عمران خان سے میری ملاقات کرانے نہیں دی جارہی تاکہ میرا رابطہ نہ ہو، ملاقات نہ ہونے کی وجہ سے پارٹی کو نقصان ہورہا ہے اور پارٹی تقسیم ہورہی ہے ۔
علی امین گنڈا پور نے کہا کہ عمران خان سے ملاقات کی اجازت نہ دینے والے ہمارے دوست نہیں بلکہ دشمن ہیں اور وہ کامیاب ہورہے ہیں کیونکہ پارٹی انتشار کا شکار ہوگئی ہے۔
ان کا کہنا تھا کہ عمران خان کی طرف سے سینٹ امیدواروں کے نام آئے، جس پر کتنے لوگوں نے کہا کہ یہ جھوٹ ہے خان نے نام نہیں دیئے بعد میں عمران خان نے خود نام دینے کی تصدیق کی تو پھر تنقید کرنے والوں میں سے پھر کسی نے معافی نہیں مانگی۔
انہوں نے کہا کہ کسی بے شرم نے نہیں کہا میں معافی مانگتا ہوں، بے شرمی والا کام یہی ہے کہ میں ڈھیٹ بن جائوں کچھ بھی نہ کہہ دوں اور ثابت بھی نہ کر سکوں۔