ویب ڈیسک: خیبرپختونخوا سے منتخب ہونے والے پاکستان تحریک انصاف کے تین سینیٹرز نے بھی حلف اٹھا لیا۔
میڈیا رپورٹس کے مطابق خیبر پختونخوا سے جنرل نشستوں پر منتخب ہونے والے پی ٹی آئی کے سینیٹر فیصل جاوید ، نور الحق قادری اور محمد مرزا آفریدی نے حلف اٹھا لیا جبکہ مراد سعید تاحال روپوش ہیں ۔
چیئرمین سینیٹ نے نئے ممبران سے حلف لیا ،حلف لینے کے بعد تینوں سینیٹرز نے ایوان میں پی ٹی آئی کے حق میں نعرے بھی لگائے ۔
واضح رہے کہ تین روز قبل خیبرپختونخوا میں سینیٹ کی 11 نشستوں پر امیدوار بلامقابلہ منتخب ہوئے، جن میں سے 6 پی ٹی آئی جبکہ 5 اپوزیشن کے امیدوار تھے۔
جنرل نشستوں پر منتخب ہونے والوں میں پاکستان تحریک انصاف کے کئی برس سے روپوش رہنما مراد سعید بھی شامل ہیں۔