ملاکنڈ ڈویژن سرسبزجنگلات اور جنگلی حیات سے پہچانا جاتا ہیں، شوکت علی یوسفزئی

سوات: کمشنر ملاکنڈ ڈویژن شوکت علی یوسفزئی کی جنگلات کی کٹائی اور سمگلنگ میں ملوث افراد کے خلاف سخت کارروائی کرنے کے احکامات پر عملدرآمد کا آغاز کردیا گیا۔ ضلعی انتظامیہ سوات نے تخت باندہ برانوی مدین تحصیل بحرین میں کامیاب کارروائی کرتے ہوئے ایک سمگلر کو موقع پر ہی گرفتار کرلیا ہے۔ کارروائی کے نتیجے میں 108 سلیپرز برآمد کرتے ہوئے ضبط کرلئے گئے ہیں۔ سلیپرز سات مختلف مکانات میں رکھے گئے تھے۔ اسسٹنٹ کمشنربحرین کی سربراہی میں سوات لیویز کی ٹیم نے صبح سویرے کارروائی کی۔ فارسٹر اور فارسٹ گارڈ مبینہ طور لیویز کی ٹیم سے پہلے پہنچے اور سمگلروں کو اطلاع فراہم کی جس کی وجہ سے سمگلرز موقع سے فرار ہونے میں کامیاب ہوئے جبکہ ایک کو گرفتار کرلیا گیا۔ واقع کے تناظر میں سمگلروں، فارسٹر اور فارسٹ گارڈ کے خلاف ایف آئی آر درج کرنے کے احکامات جاری کئے گئے ہیں۔ یاد رہے کہ کالام فارسٹ ڈویژن کے حدود تخت باندہ مدین میں ٹمبر مافیا کی موجودگی کی خفیہ اطلاع ملی تھی اور اطلاع تھی کہ متعلقہ علاقے کے فارسٹر اور فارسٹ گارڈ کے مبینہ توسط سے سمگلنگ کا عمل جاری ہے جس کا سختی سے نوٹس لیتے ہوئے کمشنر ملاکنڈ ڈویژن شوکت علی یوسفزئی نے ضلعی انتظامیہ کو کارروائی کرنے کے احکامات جاری کئے تھے۔ کمشنر ملاکنڈ ڈویژن شوکت علی یوسفزئی کا سمگلنگ واقع پر برہمی کا اظہار کرتے ہوئے کہنا تھا کہ جنگلات کی کٹائی اور سمگلنگ میں ملوث افراد کے ساتھ آہنی ہاتھوں سے نمٹا جائے گا۔ ان کا کہنا تھا کہ اس سلسلے میں اگر فارسٹ محکمے کا کوئی بھی اہلکار چاہے ڈسٹرکٹ فارسٹ آفیسر ہی کیوں نہ ہو غفلت یا ملوث ہونے کا مرتکب پایا گیا تو کارروائی ہوگی۔ کمشنر ملاکنڈ ڈویژن شوکت علی یوسفزئی کا کہنا تھا کہ جنگلات اور جنگلی حیات ملاکنڈ ڈویژن کی نہ صرف پہچان ہیں بلکہ اس سے قدرتی ماحول کو تقویت ملتی ہے اور موسمیاتی تبدیلیوں کا مقابلہ کیا جاسکتا ہے۔ ان کا کہنا تھا کہ جنگلات میں اضافہ کریں گے اور اس میں کمی لانے والے عوامل کا خاتمہ یقینی بنائیں گے۔